تقولك ماشي لأمك، وإلاّ حاسب روحك سايحْ !
لغتك غيّرتها وسيرتك بدّلتها ، ولعابنك صارت تسّايحْ !
ما عرفتك لا فاطن لا سكران، لا بهلول لا طمّاع لا جايحْ !
تحسب روحك فاهم وقاري، وأوربا وأمريكا واد شايحْ !
تمشي فيه بلا عَوْم وتقطعوا، بلا مْخاطر ولا شَمّ رْوايحْ !
شحال من نظيف رخسوه في الغربة وهو مسكين ينوض ويطّايح!
يشوفوه في الطريق من بعيد يبدلوها يصوم رمضانو وقشّو فايح !
بريّة ليك يا حرّاق أفتحها واقراها
كل شيء داير وأنت ساهل ومكتّب، وهو راه موزون بالحسابْ !
كل طريق عندها دليل، بصّح مرّات الشمس يغطّيها السْحابْ !
ما تتقلقش بزّاف بالسياسة عليك، راني عارف نبحوا عليك هذوك الكلابْ
يا لطيف ما طلقوا لا عاقل لا مجنون، لا راجل لا مرأة لا طفل هذي راها غير أسبابْ !
بريّة ليك يا حرّاق أفتحها واقراها
كي تحرق أنت راك عارف وين رايح، والاّ تفكيرك ومطارك غير وسْواس؟
فراشك وغطاك الأرض والسماء، وعيشتك طلبة وليلك ونهارك تحْواسْ ؟
الهربة من الواقع مش بطولة يابني، المستقبل والتوفير ما يجيو بالإفْلاسْ
قادرين نغيروا الكثير إذا اتفقنا وتوحدنا، وعاد عندنا ضمير وإحْسَاسْ
بريّة ليك يا حرّاق أفتحها واقراها
خلّيك من الحرقة في البحر يا صاحبي، وخليك من الأحلام الزايفة وكن عاقلْ
آخرتها موت، شحال من غني خلاّ قصرْ، وشحال من فقير مات واقف وراجلْ
الرّجولة مواقف ومبادئ، والخواتم ربي الّي يقدرها، واش عندك واش تستاهلْ
في الدنيا السيارة والجوّال، والمسكن والنساء، وفي الآخرة ما تنفع غير الفعايلْ
بريّة ليك يا حرّاق أفتحها واقراها
كيفاش يا غالط أنت في عزّ شبابك، ترمي روحك في البحرْ
تلفتلك وليت ما تفرقش، بين الشوك وبين الدقلة والتمرْ
السماء تشوف فيها أرض، والظلمة تحسب فيها قمرْ
فرق بين طُزّ والحمد لله، كيما بين الشهيلي والمطرْ
بريّة ليك يا حرّاق أفتحها واقراها
الحارق في البحر كي ذاك الزّاني، الي غلبتو شهوته وجاب ولد من السفاحْ
في لحظة طيش ودّر صوابو، وبقى طول عمرو ما يعرفش حتى طعم للتفاحْ
الكلمة كي البارود تُخرج، والرْجال تعرفهم وقت الشدة، ميش بالفوخ والزوخ والتشتاحْ
راك عارف بلّي كل شيء ولاّ بالمقلوب، أصبر ربي يفرّج،كل باب يخي دار لو مفتاحْ
بريّة ليك يا حرّاق أفتحها واقراها
آه يا وليد بلادي عارف بلّي الوقت راه عليك تبدّل، وكل شيء عليك صعابْ
خليدة وخالد لاتيين بالغناء والشطيح،كي الضبع على الجيفة وزيد معاه الغرابْ
كل واحد يجبد في جبدتو، الرشوة والنّهب، الرياء وبني عمّيس وتفضيل الأحبابْ
طاق على من طاق لغة قديمة، لكن صعيبة لمّا تصدر من إمام على المحرابْ
بريّة ليك يا حرّاق أفتحها واقراها
نعمة البترول رجعت نقمة، والجهاد ولّى شهادة وبزنسْ
إذا حبيت تقضي صالحتك قالك ديرلو في يدّيه الملح وطفّي علينا الحسْ
ناس ترمي في روحها من اليأس وتنتحر، وناس عايشة في البلاد وتتفركسْ
أمانة الرجال في رقابنا كلنا، منهم الّي مات ومنهم من مازالوا على العهد يعسّ
بريّة ليك يا حرّاق أفتحها واقراها
راني عارف وين راه العوج، وراني عشت الحقرة والتمييز قبل ما تزيد أنتَ
اسأل مُجرّب ولا تسأل طبيب يخّي قالوهالك ، والصيف ما يرجع شتاَء
الجزائر كي خليقتك ما تقدر تبدّلها، لما تشوف مش كما تسمع، الواحد ربي مش ستة
شوف بعيد قبل ما تهدّ، وعدّ، والقبر في النهاية مرجع كلّ الموتى
بريّة ليك يا حرّاق أفتحها واقراها
نور الدين خبابة
14 جويلية 2009
